24 мая ў Бараўлянах адбыліся ўрачыстыя святкаванні з нагоды 25-годдзя парафіі Маці Божай Успамогі Хрысціянаў. Юбілей стаў не толькі нагодай для ўспамінаў і падзякі, але перадусім сапраўдным святам веры, адзінства і жывой прысутнасці Бога ў гісторыі гэтай супольнасці.
На ўрачыстасць сабраліся шматлікія святары, прадстаўнікі дзяржаўнай улады, вернікі, госці і сябры парафіі. Асаблівую атмасферу свята ствараў дэвіз юбілейнага года — словы Марыі з Каны Галілейскай: «Зрабіце ўсё, што Ён вам скажа».
Менавіта гэтыя словы праходзілі чырвонай ніткай праз усю ўрачыстасць: у літургіі, афармленні, малітве і казанні.
Урачыстую святую Імшу ўзначаліў біскуп Аляксандр Яшэўскі SDB у саслужэнні іншых святароў, якія прыбылі на свята, і салезіянаў, якія працуюць у парафіі. Перад пачаткам Эўхарыстыі быў таксама асвечаны новы арган, які стаў яшчэ адным знакам развіцця і духоўнай прыгажосці парафіі. Пасля благаслаўлення біскуп Аляксандр Яшэўскі асабіста падышоў да інструмента і даў першы ўрачысты тон новаму аргану. Магутнае гучанне ўпершыню напоўніла касцёл, выклікаўшы ў прысутных хваляванне і шчырую радасць. Для многіх гэта стала сімвалічным знакам новага этапу ў жыцці парафіі — этапу, у якім музыка, малітва і прыгажосць яшчэ мацней будуць дапамагаць чалавеку адкрываць Божую прысутнасць.
У сваёй гаміліі біскуп Аляксандр падкрэсліў, што гісторыя бараўлянскай супольнасці — гэта гісторыя Божага Провіду і чалавечага даверу.
— «Парафія — гэта не проста тэрыторыя і не адміністрацыйная адзінка. Гэта супольнасць людзей, сабраных Богам, аб’яднаных адной верай, адной Эўхарыстыяй і адной надзеяй», — адзначыў іерарх.
Біскуп параўнаў гісторыю парафіі з Канай Галілейскай, дзе Бог здольны перамяніць чалавечую слабасць і недахоп у сапраўдны цуд. Ён нагадаў, што 25 гадоў таму тут прагучала малітва людзей, якія шукалі месца для супольнай малітвы і сустрэчы з Богам, а сёння гэта ўжо жывая і моцная парафіяльная сям’я.
Асаблівую ўвагу біскуп звярнуў на тых, хто на працягу гэтых гадоў будаваў і развіваў супольнасць. З удзячнасцю былі ўзгаданыя ксёндз-канонік Ігар Лашук — першы арганізатар парафіі, святой памяці кс. Станіслаў Лугоўскі, кс. Ян Немец, а таксама цяперашні пробашч кс. Казімір Шыдэлка SDB, які ўжо дваццаць гадоў нясе служэнне ў Бараўлянах.
Асобныя словы падзякі прагучалі таксама ў адрас ксёндза кан. д-р Віктара Гайдукевіча SDB дырэктара рэлігійнай місіі «Таварыства Святога Францішка Сальскага», які на працягу многіх гадоў падтрымлівае развіццё парафіі, моладзевага цэнтру і араторыя. Біскуп адзначыў, што дзякуючы яго руплівасці і вернасці духу святога Яна Боско бараўлянская супольнасць стала сапраўдным месцам сустрэчы дзяцей, моладзі і сем’яў.
— «Гэта сапраўдны стыль святога Яна Боско: дом, які прымае; касцёл, які вядзе да Хрыста; школа, якая выхоўвае да жыцця; і двор, дзе моладзь можа радасна жыць і адчуваць сябе патрэбнай», — падкрэсліў біскуп.
У гаміліі прагучалі таксама кранальныя словы пра ролю Марыі Успамогі Хрысціянаў у жыцці парафіі. Іерарх назваў Маці Божую «зоркай, якая не згасае» і якая няспынна вядзе людзей да Хрыста.
Падчас урачыстасці прагучалі словы віншаванняў ад прадстаўнікоў дзяржаўнай улады і праваслаўнай царквы.
Дэпутат Палаты прадстаўнікоў Рэспублікі Беларусь Елена Хіля адзначыла вялікае значэнне Касцёла ў жыцці чалавека і грамадства.
— «Чалавек і яго духоўнасць вызначаюцца трыма рэчамі: верай, любоўю і надзеяй. І менавіта ў касцёле чалавек знаходзіць гэтыя каштоўнасці», — сказала яна, дзякуючы святарам за духоўную падтрымку і служэнне людзям.
Старшыня Мінскай раённай арганізацыі Беларускага прафесійнага саюза работнікаў адукацыі і навукі Жанна Варабей падкрэсліла, што парафія стала сапраўдным духоўным цэнтрам Бараўлянаў.
— «Тут людзі знаходзяць падтрымку, суцяшэнне, любоў і надзею. А адкрытыя сэрцы святароў заслугоўваюць прызнання і павагі далёка за межамі гэтай супольнасці», — адзначыла яна.
Цёплыя словы прагучалі таксама ад настаяцеля праваслаўнага прыхода Святой Жываначальнай Тройцы ў Бараўлянах протаіерэя Андрэя Круцялёва, які падкрэсліў добрыя адносіны паміж каталікамі і праваслаўнымі.
— «Мы разам прапаведуем і вызнаём Уваскрослага Хрыста, разам шануем Маці Божую і стараемся быць міратворцамі», — сказаў святар.
Асабліва кранальнымі сталі ўспаміны кс. каноніка Ігара Лашука пра пачаткі парафіі. Святар распавёў, як у Бараўлянах з’явілася першая каталіцкая супольнасць, як вернікі маліліся ў прыватным доме, а пасля атрымалі зямлю для будаўніцтва капліцы.
— «Бог заўсёды вядзе так, што часам прымушае чалавека звярнуць з прамой дарогі, каб адкрыць нешта большае», — адзначыў святар, успамінаючы першыя гады існавання супольнасці.
Ён таксама выказаў словы ўдзячнасці ўсім, хто дапамагаў у будаўніцтве і развіцці парафіі, а таксама падкрэсліў вялікую ролю кс. Казіміра і салезіянаў у далейшым развіцці супольнасці.
Сам кс. Казімір Шыдэлка з уласцівай яму цеплынёй і прастатой падзякаваў усім прысутным за супольную працу і падтрымку.
— «З Італіі замест Масквы я вярнуўся ў Бараўляны. Паглядзеў і падумаў: куды я трапіў? Але сёння бачу, што Бог сапраўды ведаў, куды мяне вядзе», — з усмешкай адзначыў святар.
Пробашч падзякаваў святарам, сёстрам, прадстаўнікам улады, хору, міністрантам, валанцёрам і ўсім парафіянам, якія на працягу гадоў дапамагалі будаваць парафію.
Са словамі віншавання да прысутных звярнуліся і прадстаўнікі парафіянаў, менавіта тыя асобы, якія былі ў самым вытоку парафіі, пані Ванда і пан Ян. Асобныя словы падзякі прагучалі ў адрас кс. кан. д-ра Віктара Гайдукевіча, як падкрэслілі парафіяне, чалавека вялікай адукаванасці, мудрасці і адкрытасці. Словы казанняў якога прымушаюць задумацца і імкнуцца змяняць сваё жыццё да лепшага.
Словы асаблівай удзячнасці вернікі скіравалі таксама да пробашча парафіі кс. Казіміра Шыдэлка. У сваіх выступленнях парафіяне адзначалі яго чалавечую шчырасць, блізкасць да людзей і здольнасць быць побач з кожным — як у радасці, так і ў складаных жыццёвых момантах.
Вернікі дзякавалі святару за шматгадовую працу, клопат пра дзяцей, моладзь і сем’і, а таксама за атмасферу цеплыні, якая пануе ў парафіі.
Цёплыя словы былі скіраваныя і ў адрас сястры Марцэліны, якая рупліва служыць у парафіі. Парафіяне падкрэслівалі яе нястомную працу, ціхую адданасць і вялікае сэрца, дзякуючы якім многія мерапрыемствы, літургіі і сустрэчы адбываліся прыгожа і арганізавана.
Падчас свята былі ўручаныя падзячныя граматы прадстаўнікам дзяржаўнай улады, святарам, законным сёстрам, парафіянам і ўсім, хто зрабіў значны ўклад у развіццё супольнасці.
Напрыканцы ўрачыстасці біскуп Аляксандр узгадаў словы святога Яна Боско:
— «Даверцеся Марыі Успамозе Хрысціянаў і ўбачыце, што такое цуды». Таму давярайце Марыі і бараўлянская парафія і наступныя 25 год будзе квітнець і развівацца”, падкрэсліў іерарх.
Пасля святой Імшы адбыўся абрад асвячэння сямейнага пакою. У парафіі падкрэсліваюць, што сёння асабліва неабходна ствараць месцы, дзе сем’і могуць не толькі маліцца, але і проста быць разам, сустракацца, размаўляць, праводзіць час з дзецьмі і будаваць сапраўдныя чалавечыя адносіны.
Новая прастора задумана як адкрытае месца сустрэчы для бацькоў, дзяцей і моладзі. Тут плануецца правядзенне творчых заняткаў, сямейных сустрэч, лекцый, майстар-класаў, катэхезаў і супольных мерапрыемстваў. Асобная ўвага будзе надавацца падтрымцы маладых сем’яў і стварэнню атмасферы, у якой кожны чалавек зможа адчуць сябе патрэбным і прынятым.
Для ўдзельнікаў быў арганізаваны пачастунак, а для дзяцей — гульнявая праграма з аніматарамі, надзіманымі атракцыёнамі і забавамі.
Завяршыліся юбілейныя святкаванні канцэртам арганнай музыкі ў касцёле, які стаў прыгожым духоўным акордам гэтага асаблівага дня.
Тэкст і фота – Уладзіслаў Зарэцкі ASSCC
