Дарагая салезіянская сям’я!Чарговы раз мы перажываем галоўную праўду хрысціянскай веры — Уваскрасенне Езуса Хрыста. Сёння мы дзелімся з усімі людзьмі пасхальнай радасцю Яго перамогі над смерцю.Змёртвыхпаўстанне Езуса Хрыста з’яўляецца фундаментам нашай надзеі, якая так патрэбна ў штодзённым жыцці кожнаму веруючаму!
Сёлета мы перажываем гэтую радасную падзею праз прызму дэвізу салезіянскай сям’і на бягучы 2017 год – “Кожны дом – школа жыцця і любові”. Паміраючы на крыжы, Езус перадае нас у ласкавыя рукі сваёй Маці, робячы Яе апякункай нашых сем’яў. А сваім уваскрасеннем да жыцця, праяўляе сваю невычарпальную любоў да чалавека. Жыццё, смерць і змёртвыхпаўстанне Езуса з’яўляюцца сапраўднай школай жыцця і любові для кожнага з нас.
Няхай Змёртвыхпаўсталы Хрыстос умацуе нас, нашыя супольнасці і нашыя сем’і ў імкненні да святасці. Няхай Ён напаўняе нашыя сэрцы любоўю і супакоем. Няхай узмоцніць нашую веру ў перамогу дабра над злом, жыцця над смерцю і любові над нянавісцю, каб у нашых вачах заўсёды быў бачны бляск надзеі на жыццё вечнае.
Ад усяго сэрца віншую Вас са светлым святам Пасхі! Жадаю радаснага перажывання Велікодных святаў і Божага Бласлаўлення для кожнага з Вас!
кс. Віктар Гайдукевіч SDB
рэгіянальны настаяцель Таварыства св. Ф. Сальскага