З 20 па 24 чэрвеня ў Араторыі Святога Дамініка Савіо ў Бараўлянах адбыліся Вакацыі з Богам пад назвай "Мама Маргарыта - настаўніца міласэрнасці".
На працягу гэтых дзён дзеці глядзелі цудоўны фільм пра маму Маргарыту, каб лепей пазнаць Яе жыццёвы шлях і шмат чаму навучыцца. Пасля прагляду фільма дзеці мелі магчымасць выказаць свае думкі і ўражанні на працы па групах.
Канешне, самы незабыўны дзень быў, калі нам пашанцавала знайсці машыну часу і перамяніцца ў розныя плямёны. Плямёны не толькі прадставілі сябе, але і прынялі хрысціянскіх місіянераў. кс. Станіслаў Краўчанка SDB усіх пачаставаў смачнымі шашлычкамі і мы ўвесь дзень мы весела правялі ў лесе.
У гэтым лагеры сястра Вероніка Огар FMA праводзіла "Творчую майстэрню", у якой навучыла дзетак рабіць чырвоныя сэрцы ў тэхніцы "Пап'е-машэ". Кожнаму ўдзельніку спадабаўся гэты занятак, бо мы мелі магчымасць паспрабаваць штосьці новае і заадно зрабіць прыемны падарунак сваім бацькам.
Неспадзявана да нас завітаў кс. біскуп Аляксандр Яшэўскі SDB. Было вельмі прыемна пазнаёміцца з ім бліжэй, разам памаліцца і атрымаць благаслаўленне.
Напрыканцы нашага адпачынку дзеці з дапамогай сястры і ксянза знайшлі кошык ад Мамы Маргарыты з салодкімі падарункамі і нашымі агульнымі фотаздымкамі.
Скончылі мы Вакацыі з Богам нашым гімнам і сапраўды смачным торцікам. Кожны ўдзельнік развітаўся з жаданнем вярнуцца ізноў, каб разам крочыць да святасці.