13 чэрвеня ў базыліцы Марыі Успамогі Хрысціянаў у Турыне адбылася ўрачыстая літургія дыяканскіх пасвячэнняў, падчас якой 17 салезіянаў з 11 краін свету прынялі сакрамэнт пасвячэння ў ступені дыяканату. Сярод новых дыяканаў быў і салезіянін з Беларусі — Міхаіл Вішнеўскі SDB.
Урачыстасць прайшла ў сэрцы салезіянскай харызмы — у Турыне, дзе святы Ян Боско распачаў сваю місію служэння моладзі. Дыяканскія пасвячэнні кандыдатам удзяліў дапаможны біскуп Турынскай архідыяцэзіі Алессандро Джыраўдо.
У літургіі ўдзельнічалі прадстаўнікі салезіянскіх супольнасцяў з розных краін свету, родныя і сябры кандыдатаў, а таксама невялікая дэлегацыя з Беларусі. Яе ўзначаліў дырэктар рэлігійнай місіі “Таварыства Святога Францішка Сальскага” ў Беларусі кс. кан. д-р Віктар Гайдукевіч SDB. Разам з ім у малітве ўдзельнічалі прадстаўнікі Салезіянскай Сям’і і сябры, якія прыбылі ў Турын, каб падтрымаць беларускага кандыдата ў гэты асаблівы дзень.
Гэтая падзея стала важнай не толькі для самога Міхаіла, але і для ўсёй салезіянскай прысутнасці ў Беларусі, якая з надзеяй і радасцю суправаджала яго на чарговым этапе паклікання.
Падчас гаміліі біскуп заклікаў новых дыяканаў быць вернымі слугамі Евангелля, несці людзям надзею і сведчыць пра Хрыста праз пакорнае і ахвярнае служэнне. Асаблівую ўвагу ён звярнуў на дыяканскае пакліканне як шлях служэння Божаму Народу ў духу любові, блізкасці і адкрытасці на патрэбы іншых.
Для Міхаіла Вішнеўскага гэты дзень стаў важным этапам на шляху падрыхтоўкі да святарства. Пасля гадоў фармацыі, вучобы і духоўнага сталення ён зрабіў чарговы крок у поўным прысвячэнні свайго жыцця Богу і моладзі паводле духа святога Яна Боско.
Пасля прыняцця дыяканскага пасвячэння малады салезіянін вернецца ў Беларусь, дзе будзе несці служэнне сярод моладзі і вернікаў, працягваючы сваю фармацыю на шляху да святарства.
Каментуючы гэтую падзею, кс. кан. д-р Віктар Гайдукевіч SDB адзначыў:
“Стоячы сёння ў базыліцы Марыі Успамогі Хрысціянаў, дзе маліўся, працаваў і здзяйсняў сваю місію святы Ян Боско, я асабліва адчуваў удзячнасць Богу за дар паклікання нашых сабратоў, а асаблівым чынам — за пакліканне Міхаіла.
Для салезіянскай супольнасці ў Беларусі дыяканскае пасвячэнне нашага сабрата Міхаіла Вішнеўскага — гэта сапраўдны знак Божай апекі і надзеі на будучыню. Мы молімся, каб ён быў добрым, а перадусім верным салезіянінам, які з радасцю будзе служыць Богу і моладзі.
Просім таксама Пана, каб у свой час ён стаў святаром паводле Сэрца Хрыста і духа святога Яна Боско”.
Салезіянская Сям’я ў Беларусі радуецца разам з новым дыяканам і даручае яго служэнне заступніцтву Найсвяцейшай Панны Марыі Успамогі Хрысціянаў і святога Яна Боско, просячы аб патрэбных ласках для яго будучага служэння Касцёлу і моладзі.
