• вул. Багушэвіча, 12
• в. Жупраны, 231102
• Ашмянскі р-н
• Гродзенская вобл.
• Тэл.: (8-01593) 3-73-01

Адпуст: 29 чэрвеня

Першы драўляны касцёл у Жупранах быў пабудаваны каля 1550 г. Пад канец XVI стагоддзя каталіцкі храм прыстасоўваюць пад кальвінскі збор. У 1854 г. па фундацыі графа А. Чапскага распачынаецца будаўніцтва новага мураванага касцёла. У працах прымаў удзел беларускі пісьменнік Францішак Багушэвіч. З-за недахопу грошай і паўстання 1863 г. будаўніцтва было прыпынена. У 1875 г. храм дабудоўваюць да канца і асвячаюць у гонар святых апосталаў Пятра і Паўла. У 1900 г. у касцёле адпраўляецца жалобная Імша па святой пямяці Францішку Багушэвічу. Яго магіла і сёння знаходзіцца на могілках за касцёлам. Унутры храма ў 1901 годзе ў сцяну была ўмуравана памятная пліта з партрэтам беларускага песняра, выкананая скульптарам Янам Арасімовічам. Будынак касцёла пабудаваны ў стылі неаготыкі. Аб'ёмна-прасторавы выгляд касцёла даволі спрошчаны: накрыты двухсхільным дахам цагляны паралелепіпед, да якога з франтальнага боку далучаецца вежа. Касцёл адрозніваецца ад іншых храмаў выдатнай паліхромнай бутавай муроўкай фасада з рэльефнымі карункамі. Каменныя плоскасці сцен арганічна спалучаюцца з абтынкаванымі фігурнымі лапаткамі ў кутах масіўнага аб'ёму. З незвычайным густам падабрана колеравая гама камянёў: ад жоўтай охры да тэракотава-чырвонага. Імклівасці ўгару надаюць святыні маленькія вежачкі, якія абрамляюць галоўную вежу, а таксама бакі святыні.