З 18 па 21 студзеня на Вальдокко, вельмі харызматычным месцы, адбываліся дні Духоўнасці Салезіянскай Сям’і. Гэта падзея сабрала разам прадстаўнікоў 31 суполкі, з якіх складаецца Салезіянская Сям’я. Кожная інспекторыя, рэгіён і іншыя структуры імкнуліся прыняць удзел у гэтых днях. Сабралося больш за 370 чалавек.

Мне таксама пашанцавала ўдзельнічаць у днях Духоўнасці ў якасці прадстаўніка салезіянскага дома ў Турыне. Жадаючы падзяліцца з вамі маёй радасцю, а таксама і вам дапамагчы яе адчуць, распавяду пра тое, што адбывалася ў гэтыя дні на Вальдокко.

Праграма была вельмі насычанай і цікавай. Усе аспекты, якія абмяркоўваліся, былі звязаны з дэвізам Генеральнага Настаяцеля на гэты год: “«Пане, дай мне гэтай Вады!». Культывуем мастацтва слухаць і суправаджаць” і бралі свой пачатак з падрыхтоўкі Сінода 2018 пра моладзь, які, як казаў дон Анхель Фярнандэс Арціме, з’яўляецца благаслаўленнем для Салезіянскай Сям’і. Іншымі словамі, дні Духоўнасці дапамагалі рыхтавацца да Сінода.

У першы дзень пасля тэатральнай імпрэзы, у якой праз танец была прадстаўлена Евангельская сцэна з самарытанкай, дзесяты наступнік ксяндза Боско прадставіў дэвіз гэтага года ва ўсёй яго тонкасці і канкрэтнасці. Спачатку ён растлумачыў плакат, які з аднаго боку прадстаўляе малюнак з моладзю розных нацыянальнасцяў з усяго свету. Гэтая моладзь праз ксяндза Боско атрымлівае жывую ваду з сэрца Езуса, побач з Якім стаіць Марыя і самарытанка. Гэтая вада наталяе смагу, абмывае і дапамагае стаць місіянерам для іншых, дзелячыся з імі. З другога боку прадстаўлены сапраўдныя маладыя людзі, для якіх Салезіянская Сям’я павінна адчыняць сваё сэрца і несці ім ваду Езуса!

Сучасная моладзь патрабуе, каб яе нехта сустрэў персанальна (асабістая сустрэча, дзе ёсць час на маладога чалавека), дапамог узрастаць і развівацца. Моладзь патрабуе, каб яе выслухалі і суправадзілі.

“А чаго мы чакаем?” – запытаў генерал Салезіянскую Сям’ю. – “Наперад! І ўжо сёння!”. Дон Анхель у адным накірунку з Папай Францішкам прадставіў тры важныя моманты:

  1. Сустрэча, якая не пакідае абыякавым (СЛУХАЦЬ): прыняць маладога чалавека і выслухаць;
  2. сустрэча, якая падштурхоўвае наперад (РАСПАЗНАННЕ): дапамога для ўсёй моладзі, не толькі для лепшых і выбраных;
  3. сустрэча, якая змяняе жыццё (СУПРАВАДЖЭННЕ): суправаджаць маладога чалавека да Езуса, бо толькі Ён можа змяніць жыццё знутры.

Вялікім прыкладам выхавацеля, які суправаджае нас духоўна, безумоўна з’яўляецца ксёндз Боско. Ксёндз Боско займаўся выхаваннем і евангелізацыяй, ён быў геніяльным суправадзіцелем, моладзь яму давярала і сябравала з ім, ён быў духоўным кіраўніком. Пры гэтым тон суправаджэння для кожнага быў свой, да кожнага быў асабісты падыход, для кожнага знаходзіўся час. Таму кожная салезіянская справа павінна вызначацца гасціннасцю і часам для моладзі і сярод моладзі. У нашых сем’ях неабходна развіваць культуру пакліканняў, якая не абмяжоўваецца пакліканнем да манаскага і святарскага жыцця. Маладым людзям неабходна дапамагчы зразумець, што пакліканне, жыццё – гэта ахвяраванне сябе іншым і служэнне ім!

Генеральны Настаяцель прыгадаў, што наша служэнне павінна вызначацца салезіянскім стылем, духоўным кліматам, а не толькі абмяжоўвацца сацыяльнай працай і гульнямі. Наша служэнне павінна быць таксама знакам радасці жыцця, а сведчанне членаў Салезіянскай Сям’і павінна быць сведчаннем шчаслівых людзей, якім паверыць моладзь. Вечарам быў момант для прадстаўлення кожнай галіны Салезіянскай Сям’і і супольны час у сямейным стыле, закончылася ўсё слоўкам на добрую ноч, якое прамовіў ксёндз Анхель.

У наступныя дні праца вялася над трыма складаючымі дэвіза гэтага года: слухаць, распазнаваць, суправаджаць. У другі дзень сястра Паола Казаліс FMA прадставіла аспект умення слухаць, які часта знікае ў рэчаіснасці, але з’яўляецца неабходным. Слухаць - гэта стан з уважлівым поглядам, з даверам, чаканнем і свабодным сэрцам, дзе ёсць месца для Езуса. Толькі такое слуханне можа стаць суправаджэннем.

Пасля выступлення с. Паолы маладая італьянская сям’я з галіны Салезіянскай Сям’і “Сведкі Ўваскрослага” падзялілася сваім вопытам суправаджэння, распавядаючы, як у свой час суправаджалі іх і як зараз яны суправаджаюць моладзь і сем’і.

Другая канферэнцыя, якую падрыхтаваў ксёндз Хуан Крэспо SDB, звяртала ўвагу, ў першую чаргу, на аспект распазнання. Пасля салезіянская сям’я, раздзяліўшыся на 15 моўных груп, працавала над стварэннем дэкалога (10 запаведзяў) салезіянскага суправаджаючага. Вечарам усе сабраліся ў базыліцы Марыі Успамогі для малітвы, чування і споведзі.

У трэці дзень Міхал Войташ SDB прадставіў у сваёй канферэнцыі салезіянскі стыль суправаджэння, абапіраючыся на прыклад св. Яна Боско. Дадзены стыль мае свае этапы і характэрныя рысы:

  • прыняць маладога чалавека, каб ён мог адчуць сябе жаданым;
  • канкрэтны выклік, які дапамагае развіць дары і таленты і ўбачыць усю праўду і глыбіню асобы;
  • давер сэрца, які выхоўвае і суправаджае;
  • крызіс, які вядзе да трансфармацыі;
  • канкрэтнае рашэнне і выбар;
  • абавязак, які праяўляецца ў дзеянні.

Пасля канферэнцыі двое іспанскіх супрацоўнікаў у салезіянскім асяроддзі падзяліліся сваім вопытам, распавядаючы, чым для іх з’яўляецца суправаджэнне і давалі таксама вострыя, але справядлівыя парады членам Салезіянскай Сям’і. Калі маладыя людзі ўжывую альбо праз відэа распавядалі пра свой вопыт і адчуванні, калі іх суправаджае нехта, хто верыць у іх і вядзе да Езуса, было відавочна, што яны кажуць пра тое, што насамрэч робіць іх шчаслівымі.

Даючы парады, усе ў адзін голас, хоць і на розных мовах паўтаралі: “Салезіяне, будзьце даступнымі, вы жа салезіяне! Выходзьце да моладзі са сваіх офісаў! Не выключайце нікога! Глядзіце на моладзь і сустракайцеся з ёй, дайце ёй зразумець, што яна важная для вас! Будзьце акном, праз якое праходзіць свет Бога! Суправаджайце таксама сабратоў у фармацыі!”. Варта падкрэсліць, што гэтыя парады былі скіраваны да ўсёй салезіянскай сям’і: SDB, FMA, ASC і да кожнай 31 галіны.

Трэці дзень мы скончылі лірычна-музычным канцэртам у гонар пачатку святкавання 150-годдзя кансэкрацыі базылікі Марыі Успамогі Хрысціянаў.

Апошні дзень распачаўся са святой Імшы, якую ўзначаліў Генеральны Настаяцель. Пасля Імшы на фінальнай сустрэчы ксёндз Анхель падвёў вынікі гэтых благаславёных і выдатных дзён Духоўнасці Салезіянскай Сям’і, падкрэсліваючы іх важнасць. Таксама ён прэзентаваў усім дэкалог салезіянскага суправаджэння, які распрацавалі удзельнікі ў гэтыя дні.

Дзякуй Богу за гэту цудоўную Сям’ю!

Больш фота і відэа з дзён Духоўнасці Салезіянскай Сям’і можна ўбачыць па спасылцы

 

Турын
23.01.2018 г.

 

Знайшлі памылку? Вылучыце яе і націсніце «Ctrl + Enter»

Фотагалерэя

Тэгі

Пра нас

Кіраўніцтва Рэлігійнай Каталіцкай Місіяй “Таварыства св. Фрацішка Сальскага”

Рэгіянальны Настаяцель Місіі:
кс. Віктар Гайдукевіч SDB

Вікарый і эканом Місіі:
кс. Алег Жураўскі SDB

Радныя:

Каляндар

Люты 2018
Нд Пн Вт Ср Чц Пт Сб
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28

Выбраныя запісы

  • Пасланне Генеральнага настаяцеля да моладзі на Урачыстасць святога Яна Боско
    Мая дарагая моладзь, Дазвольце мне прывітаць вас з вялікай
  • Дні Духоўнасці Салезіянскай Сям’і вачыма кс. Алега Каралёва SDB
    З 18 па 21 студзеня на Вальдокко, вельмі харызматычным
  • Ксёндз Боско вучыў, што Бог прагне, каб мы заўсёды былі шчаслівымі
    Больш чым калі-небудзь я перакананы, што ксёндз Боско і
Угору