Аўторак, 03 Кастрычнік 2017 14:11

Генеральная Настаяцельніца салезіянак, Апостальскі Нунцый і кардынал з Бельгіі: Ганаровыя госці прынялі ўдзел у адкрыцці мінскага араторыя

Аўтар Раман Гапцар, аніматар

1 кастрычніка адбылося адкрыццё мінскага араторыя. Адметнай гэта падзея была таму, што спалучылася з візітам Генеральнай Настаяцельніцы сясцёр салезіянак сястры Івон Рэнгуа FMA.

Распачалося свята са святой Імшы, якая адбылася ў новым касцёле. Яе ўзначаліў яго Эмінэнцыя кардынал Юзаф Дэ Кесель, які прыбыў у нашу краіну з Бельгіі на асамблею Рады Канферэнцый Біскупаў Еўропы. Таксама на свяце прысутнічаў Апостальскі Нунцый арцыбіскуп Габар Пінтэр. У гаміліі іерарх разважаў над словамі Евангелля, што не заўсёды той, хто жыве, выконваючы закон Божы, мае любоў да Бога і бліжняга, яны лічаць сябе дасканалымі і ганарацца гэтым. Шматлікія грэшнікі наадварот, усведамляюць сваю недасканаласць і імкнуцца выправіцца, адчуваючы Божую любоў.

“Евангелле – гэта не проста мараль, якая з найвышэйшай дакладнасцю адрознівае злых і добрых, каб мы мелі магчымасць далучыць сябе да добрых. Можна быць дасканалым у адпаведнасці з законам, але калі нехта робіць гэта для сябе, каб гэта ўбачылі, каб узвысіцца над іншымі, тады гэта толькі ганарыстасць”, – сказаў кардынал.

Пасля святой Імшы ўсе вернікі накіраваліся ў араторый святога Яна Боско, дзе адбыўся працяг святочнай праграмы. Дзеці і моладзь мелі магчымасць пагуляць у разнастайныя гульні, паўдзельнічаць у латарэі, а таксама падсілкавацца. А распачалося ўсё з невялічкага лялечнага тэатру, праз які аніматары падкрэслілі дэвіз салезіянскай сям’і  на новы пастаральны год, які гучыць так: “Культываваць мастацтва слухаць і суправаджаць”.

Аніматары выказалі гэта наступнымі словамі: “Дазваляйце моладзі свабодна пытацца, выказваць свае заўвагі, перапрашаць, бо выслухоўваць – гэта значыць абдымаць сэрцам таго, хто з намі размаўляе. Падбадзёрвайце моладзь, а таксама суправаджайце, будзьце побач, будзьце прыкладам не толькі ў парадах, а таксама ў працы і ў жыцці”.

Праводзіўся ў гэты дзень у араторыі таксама і сямейны конкурс пірагоў. Шматлікія сем’і вернікаў прымалі ў ім удзел. Яны прынеслі ў араторый смачныя і прыгожыя вырабы, а кампетэнтнае журы выбірала сярод іх самы смачны! Падарункі пераможцы атрымалі з рук Апостальскага Нунцыя Габара Пінтэра і сястры Івон.

Напрыканцы свята да сабраных з традыцыйным салезіянскім слоўкам звярнулася сястра Івон. Яна падкрэсліла, што вельмі рада была наведаць Беларусь, папрысутнічаць на адкрыцці араторыя. Сястра сказала, што беларусаў яна забірае з сабой у сваім сэрцы. Таксама Генеральная Настаяцельніца навучыла дзяцей некаторым словам на французскай мове.

Фотагалерэя

Апошнія навіны

Думкі ксяндза Боско

Без цярпення не можам стаць святымі.

Св. Ян Боско