Серада, 14 Снежань 2016 13:11

«Бацькі і дзеці» — на РДС ў Мінску моладзь разважала над адносінамі ў сям’і

Аўтар Ірына Гінько

З 10 па 11 снежня ў араторыі імя cвятога Яна Боско ў Мінску адбыліся чарговыя рэкалекцыі «Разважанні аб добрай смерці» (РДС), якія сабралі каля 25 удзельнікаў. Моладзь з Бараўлян, Смаргоні, Дзятлава і Мінска прыехала дзеля таго, каб паразважаць над тэмай «Адносіны ў сям’і: бацькі і дзеці»

Рэкалекцыі распачаліся адмысловай гульнёй. Нават там, каб пераадолець выпрабаванні і выканаць усе ўмовы, трэба было стаць адной моцнай сям’ёй.

Падчас канферэнцыі, якую праводзіў кл. Марк Найдзіч SDB, малады салезіянін прапанаваў заплюшчыць вочы, ўявіць партрэт сваёй сям’і і адказаць сабе на некалькі пытанняў: Хто там? Яны ўсміхаюцца? Я там ёсць? Было неаднаразова падкрэслена, сям’я — гэта дар. Ці дзякуем мы за яго Пану Богу? Ці ўмеем прабачыць? На тэму прабачэння сабраныя паглядзелі мастацкі фільм «Дзіця кастрычніка». Пасля некаторых каментараў сястры Тэрэзы Сальнічак FMA і анонсавага прагляду кожны меў магчамасць падзяліцца сваімі ўражаннямі і думкамі. Увечары перад Найсвяцейшым Сакрамэнтам у цішыні маладыя людзі падзякавалі Богу за свае сем’і, таксама была магчымасць перапрасіць Бога ў сакрамэнце споведзі.

На другі дзень пасля смачнага снядання кс. Іван Огар SDB звярнуў увагу моладзі на важнасць дыялогу ў сям’і, уменне слухаць і выказваць падзяку. З дапамогай кс. Алега Каралёва SDB удзельнікі РДС засяродзіліся на  Слове Божым, разважаючы над сям’ёй Езуса Хрыста.
Далей — «пустыня» (час цішыні і сустрэчы з Богам сам на сам, каб абмеркаваць з Ім усё пачутае і перажытае) і святая Імша.

Фотагалерэя

Апошнія навіны

Думкі ксяндза Боско

Калі чыніш дабро ці змагаешся са спакусамі, даверся Марыі, каб быць гатовым на прыніжэнне, патаптанне чалавечай годнасці і, таксама, на цярпенне

Св. Ян Боско