Субота, 31 Жнівень 2019 00:06

У Смаргонi ўрачыста адкрылi спартыўную пляцоўку

Аўтар Уладзіслаў Зарэцкі ASC

28 жніўня ў смаргонскай парафіі святога Міхала Арханёла каля моладзевага араторыя імя св. Яна Боско была ўрачыста адкрыта спартыўная пляцоўка імя благаслаўлёнага салезіяніна Стэфана Шандора. На спартыўнае свята была запрошана моладзь з усіх салезіянскіх араторыяў Беларусі. Маладыя людзі пазмагаліся за першы спартыўны трафей на новай пляцоўцы, абараняючы гонар свайго араторыя ў валейбольных спаборніцтвах.

Распачалося адкрыццё з малітвы і словаў падзякі ад рэгіянальнага настаяцеля салезіянскага таварыства на Беларусі кс. Віктара Гайдукевіча SDB. Ксёндз дэлегат выказаў словы падзякі усім, дзякуючы каму паўстала пляцоўка: Смаргонскаму раённаму выканаўчаму камітэту, ДРСУ №134, філіялу КУП “ГРОДНААБЛБУД”, Гапону Мікалаю Мікалаевічу з УП “Iнстытут Маладзечнапраект”, Тоўкачу Валянціну Баляслававічу і прадстаўніцы дабрачыннай арганізацыі “Карытас Лінц” Зігрыт Шпільдэльбэк, якая аказвала фінасавую дапамогу. Новапабудаваная пляцоўка была перададзена на рукі мясцовым святарам - ксяндзу Алегу Жураўскаму SDB, дырэктару смаргонскай салезіянскай супольнасці, і ксяндзу Артуру Ляшнеўскаму SDB, адказнаму за араторый св. Яна Боско, якія будуць клапаціцца, даглядаць і арганізоўваць дзейнасць на спартыўным аб’екце.

Пасля пляцоўка была ўрачыста асвечана і была перарэзана сімвалічная чырвоная стужка. Моладзь вышла на штучны газон, каб прадэманстраваць свае спартыўныя таленты. Першымі за перамогу змагаліся араторыі Дзятлава і Бараўлянаў. Было відавочна, што дзятлаўская моладзь была лепш падрыхтаваная, маладыя людзi не пакінулі Бараўлянам ніводнага шансу і трапілі ў фінал. У другой гульні гаспадары пляцоўкі таксама без вялікіх перашкод перамаглі Мінск. У матчы за бронзу барацьба была больш напружанай, але юнакі і дзяўчаты з Бараўлянаў паказалі сапраўдны спартыўны характар і заваявалі трэццяе месца. Фінал стаў сапраўдным упрыгожваннем турніру - добрыя камбінацыі, блокі, розыгрышы - гледачы ўбачылі ўсё, за што мы любім валейбол. У выніку ўпартай барацьбы запаветны кубак адправіўся ў Дзятлава.

Напрыканцы вечара была паказана сцэнка пра жыццё благаслаўлёнага Стэфана Шандора, якую падрыхтавала моладзь са смаргонскага араторыя. Кожная каманда атрымала прызы і ўзнагароды за ўдзел. А завяршылася свята традыцыйным салезіянскім слоўкам на добрую ноч.
Пляцоўка імя благаслаўлёнага Стэфана Шандора адкрыта, і зараз будзе выкарыстоўвацца на карысць моладзі ў справах выхавання.

Фотагалерэя

Апошнія навіны

Думкі ксяндза Боско

Смерць – для некаторых, хто мае супакойнае сумленне з’яўляеццп суцехай,  мейсцам, якое вядзе да дасканаласці, шчасця, Для таго хто  мае на душы грэх, наадварот, з’яўляецца найвялікшай мукай, тэрорам, цярпеннем, роспаччу

Св. Ян Боско