Пятніца, 10 Май 2019 23:32

Салезіянская моладзь са Смаргоні і Дзятлава пабывала на Дыяцэзiяльных Днях Моладзi ў Шчучыне

Аўтар

З 6 па 8 мая ў Шчучыне адбыліся Дыяцэзiяльныя Дні Моладзі Гродзенскай дыяцэзіі. На гэтым фэсце пабывалі таксама прадстаўнікі салезіянскіх араторыяў са Смаргоні і Дзятлава.

Усяго ў сустрэчы ўдзельнічала больш за 1000 чалавек з розных парафій Гродзеншчыны, а таксама прадстаўнікі Мінска-Магілёўскай архідыяцэзіі.

Дэвізам сёлетняга ДДМ ў Шчучыне былі словы: “Па прыкладу Марыі буду служыць Пану”. І сапраўды прысутнасць Марыi была відавочна паўсюль: разнастайныя набажэнствы ў Яе гонар, канферэнцыі, прадстаўленні, спевы і само тое, што Дні Моладзі адбываліся ў санктуарыі Маці Божай Фацімскай, якой прысвечаны мясцовы касцёл ордэна піяраў.

У першы дзень святую Імшу цэлебраваў Яго Эксцэленцыя кс. біскуп Юзаф Станеўскі, старшыня Камісіі па справах моладзі пры ККББ. У гаміліі ксёндз біскуп заклікаў прысутную моладзь: “Езус – найлепшы ўзор маладосці. Таму вельмі важна ўглядацца ў маладога Езуса, якога паказвае Евангелле, бо ў Ім можна распазнаць шмат прыкмет, характэрных для маладых сэрцаў. Зрабіце Касцёл маладым і навучыцеся слухаць”.

Духоўным узбагачэннем дня была таксама канферэнцыя на тэму “Роля служэння ў жыцці хрысціяніна”, якую прамовіў а. Юрый Находка OCD, настаяцель кармэліцкага кляштара ў Гудагаі.

Адным з самых гучных момантаў першага дня стаў канцэрт салезіянскага музычнага гурта “Пілігрымы”. Удзельнiкi музычнага гурта па-сапраўднаму распалілі дажджлiвае надвор’е і сагрэлі маладых, якія сабраліся каля сцэны. Падчас канцэрта неаднойчы можна было пачуць пра св. Яна Боско, якому таксама было прысвечана некалькі спеваў. Аніматары смаргонскага араторыя разам з с. Юліяй Клявец FMA і дк. Артурам Ляшнеўскім SDB загадзя паклапаціліся пра танцавальную анімацыю i паказвалi на сцэне рухi новых бансаў.

Другі дзень быў вельмі насычаны на сустрэчы. У першай палове моладзь мела магчымасць паслухаць святароў, якія падрыхтавалі канферэнцыі на тэму "Формы хрысціянскага служэння для моладзі". Удзельнікі былі падзелены на групы, у якіх закраналіся наступныя тэмы: 1) Місійнае служэнне; 2) Дабрачыннае служэнне; 3) Манаскае служэнне; 4) Святарскае служэнне; 5) Сямейнае служэнне; 6) Служэнне ў каталіцкіх СМІ; 7) Евангелізацыйнае служэнне; 8) Парафіяльнае служэнне.
Сэрцам дня стала, канешне, Эўхарыстыя, якую ўзначаліў Яго Эксцэленцыя кс. арцыбіскуп Габар Пінтэр, Апостальскі Нунцый у Беларусі.

Моладзь прывітала дастойнага госця перад касцёлам гучнымі апладысментамі і каляровымі сцягамі сваіх мясцовасцей і парафій. Пасля працэсійнага ўваходу распачалася Найсвяцейшая Ахвяра, падчас якой арцыбіскуп Габар Пінтэр звярнуўся да моладзі з наступнымі словамі: “Не бойцеся даверыцца Езусу! Не бойцеся ісці з Ім па дарозе жыцця. Не бойцеся выбраць Яго адзіным Ідэалам, Братам, Сябрам, Улюбёным! Гэта не толькі самы разумны і мудры выбар: гэта выбар, аб якім вы ніколі не пашкадуеце”.

Пасля абеда на сцэне адбывалася прэзентацыя моладзевых груп Гродзенскай дыяцэзіі на тэму “Марыя прыкладам жыцця”. Моладзь Смаргоні выступіла з нумарам, у якім хацела паказаць як многа значыць Марыя для Салезіянскай сям’і i яе дзейнасцi. Асаблівым чынам быў падкрэслены салезіянскі араторый, які распачаўся з аднаго “Вітай, Марыя” ва ўрачыстасць Беззаганнага Зачацця Маці Божай. Тым самым кожны салезіянскі араторый стаў своеасаблівым “Домам Марыі” – месцам, якое Панна Успамога Хрысціянаў мае пад сваім плашчом апекі. У нумары прагучаў адмысловы спеў пра араторый. Падчас прадстаўлення на сцэне паявіўся макет смаргонскага касцёла, мядзведзь і баранкі – сімвалы горада Смаргоні, а таксама кс. Боско і св. Марыя Дамініка Мадзарэлла.

Увечары моладзь удзельнічала ў фацімскай працэсіі з фігурай Божай Маці, якая была змешчана на сцэне. Пасля ружанцовай малітвы прысутная моладзь аддала сябе цалкам Беззаганнай Панне. Відавочным сімвалам гэтага акта стала тое, што кожны атрымаў медалік з выявай Багародзіцы. Заканчэннем дня быў вечаровы канцэрт моладзевага гурту Open з Гродна.

Апошні дзень парадаваў удзельнікаў інтэграцыйнымі гульнямі і канцэртам гурта AVE з Гродна. Развітаннем са Шчучынам стала святая Імша, якую ўзначаліў Яго Эксцэленцыя кс. біскуп Аляксандр Кашкевіч, біскуп Гродзенскі. Ардынарый дыяцэзіі-гаспадара ДДМ падбадзёрыў моладзь наступнымі словамі: “Бог жадае нашага сапраўднага шчасця больш, чым жадаем яго мы самі, і калі Ён нам штосьці забараняе ці чагосьці не дазваляе, то робіць гэта толькі таму, што нас любіць і ведае, што не ўсё служыць нашаму праўдзіваму дабру”.

ДДМ у Шчучыне 2019 сталi сапраўдным святам маладых. Цудоўны клімат, шмат энергіі і ўсмешак моладзі сталі сапраўдным зарадам Божага духу для ўсіх удзельнікаў.

Фотагалерэя

Апошнія навіны

Думкі ксяндза Боско

Мы будзем збаўлены дзякуючы Божай Ласкі і Яго дапамогі, якой заўсёды хопіць, каб толькі была на тое наша воля. Маліцеся, каб малітва з гэтай мэтай была сапраўды дзейнай. Праз веру атрымаеце тое, аб чым просіце.

Св. Ян Боско