Нядзеля, 17 Люты 2019 21:21

Салезіянскі суперкубак па мікра-футболе завяршыўся перамогай “Землякоў”

Аўтар Уладзіслаў Зарэцкі ASC

16 лютага ў Смаргоні прайшла другая сустрэча футбольных каманд “Землякі” і “Маладыя” у рамках салезіянскага суперкубка па мікра-футболе. У выніку ўладальнікам кубка стала каманда “Землякі”.

Фармат правядзення суперкубка складаецца з дзвюх сустрэч, за перамогу ў ім змагаюцца дзве каманды: пераможцы “Кубка Дона Боско”, турніру па мікра-футболе, які праводзіцца ў Мінску, і пераможцы “Кубка Салезіянскага араторыя”, які праводзіцца ў Смаргоні. У гэтым годзе пераможцамі мясцовых спаборніцтваў сталі каманды “Землякі” і “Маладыя”.

Першая гульня адбылася 9 лютага ў Мінску, там перамогу з лікам 4:1 атрымалі гаспадары пляцоўкі “Землякі”. 16 лютага каманды зноў сустрэліся на футбольным полі, ужо ў Смаргоні, і на гэты раз перамогу з лікам 3:6 атрымалі таксама “Землякі”.

Такім чынам, “Землякі” сталі другім уладальнікам салезіянскага суперкубка, у мінулым годзе гэты трафей заваявалі хлопцы з каманды “Вінегрэт”, якая была лепшай на турніры “Кубак Дона Боско”, а ў суперкубку перамагла каманду “Bosco”.

Так завяршыўся сёлетні футбольны салезіянскі сезон, зараз хлопцы могуць прыходзіць на спартыўныя пляцоўкі і ў араторыі для таварыскіх сустрэч і трэніровак.

Далей нас чакае турнір для падлеткаў “Кубак Дамініка Савіо”, які адбудзецца ў Мінску.

Фотагалерэя

Апошнія навіны

Думкі ксяндза Боско

Памятайце, што ўшанаванне нядзельных свят прыносіць Божае благаслаўленне на ўсе справы тыдня

Св. Ян Боско