Субота, 29 Снежань 2018 22:52

Аплатковая сустрэча Арцыбіскупа Тадэвуша Кандрусевіча з дзецьмі

Аўтар Уладзіслаў Зарэцкі ASC

29 снежня адбылася аплатковая сустрэча Метрапаліта Мінска-Магілёўскага Арцыбіскупа Тадэвуша Кандрусевіча з дзецьмі. Спатканне па традыцыі адбывалася ў салезіянскай парафіі імя Св. Яна Хрысціцеля ў Мінскай Серабранцы.

Распачалася сустрэча са святой Імшы, якая выглядала вельмі святочна, прэзбітэрыўм быў запоўнены святарамі, якія прыбылі разам са сваімі парафіяльнымі групамі, таксама было і шмат маладых міністрантаў, а Серабранская капліца ледзь змясціла ўсіх дзетак і іх бацькоў, якія прыбылі на сустрэчу.

Падчас навукі арцыбіскуп Тадэвуш звярнуўся да дзяцей і праз шэраг пытанняў высветліў, што яны ведаюць пра Божае Нараджэнне. Варта адзначыць, што дзеці вельмі трапна адказвалі на пытанні Метрапаліта і паказалі, што яны вельмі добра ведаюць гісторыю нараджэння Збаўцы. Пасля іерарх пажадаў дзеткам і іх бацькам каб заўсёды дзверы ў іхніх сэрцах былі адчынены для Езуса.

Калі завяршылася Імша ўсе перайшлі ў будынак салезіянскага араторыя, дзе і адбылася аплатковая сустрэча. Мясцовай моладдзю і аніматарамі была падрыхтавана святочная праграма, з бансамі, спевамі і тэатральным прадстаўленнем. На вялікую радасць дзяцей іх прывітаў казачны персанаж, а менавіта Карлсан, які правёў з дзецьмі некалькі забаў і дапамог падрыхтавацца да выступлення артыстаў. У сцэнцы два мушкецёры спрачаліся паміж сабою аб існаванні Бога, але нябесныя зорачкі, лясныя жывёлы, анёл Габрыэль а пасля ўжо і Юзаф з Марыяй пераканалі няверуючага ў тым, што Бог сапраўды існуе, і што Езус нарадзіўся для кожнага з нас.

Дзяленне аплаткай для дзяцей было сапраўднай радасцю, яны з вялікай ахвотай выстраіліся ў чаргу, каб выказаць свае пажаданні Метрапаліту, таксама амаль кожны жадаў і сфатаграфавацца з арцыбіскупам. Дзяліліся дзеці і паміж сабою, сваімі бацькамі, святарамі і сёстрамі якія прысутнічалі на сустрэчы.

У гэтым годзе на сустрэчу сабралася каля 250 дзяцей са шматлікіх парафій, прыемна бачыць такую вялікую колькасць маладых каталікоў.

Фотагалерэя

Апошнія навіны

Думкі ксяндза Боско

Хто ведае, што яго любяць, той таксама любіць.

Св. Ян Боско