Пятніца, 10 Жнівень 2018 17:14

У вёсцы Мажэйкі адбыўся летнік для юнакоў ProVocatio

Аўтар Дыякан Артур Ляшнеўскі SDB

З 26 ліпеня па 7 жніўня ў вёсцы Мажэйкі Пастаўскага раёна адбыўся летнік для хлопцаў ProVocatio, які традыцыйна накіраваны на духоўны ўзрост юнакоў і дапамагае ў распазнанні жыццёвага паклікання.

 

Сёлета летнік для юнакоў праходзіў пад дэвізам “Леў і Баранак”. Хлопцы ў гэтых двух біблійных сімвалах пазнавалі Езуса з Назарэта і стараліся наблізіць рысы як духоўнага льва, так і баранка да свайго жыцця. У тэматыку паглыбляліся кожны дзень праз канферэнцыі, размовы і разважанні.

Удзельнікі штодзень духоўна насычаліся пад час сустрэчы на Літургіі гадзінаў, ранішняй медытацыі, ружанца, Lectio Divina і штодзённай Адарацыі, якая падсумоўвала дзень. Акрамя гэтага, юнакам было прапанавана шмат гульняў, якія паспрыялі добраму клімату ў летніку і радаснаму настрою ўдзельнікаў.

Адметнасцю сёлетнега летніка былі падарожжы. Удзельнікі наведалі з пілігрымкай браслаўскі санктуарый Маці Божай Каралевы Азёраў, касцёлы ў Відзах, Слабодцы, Дунілавічах, Лучаі, Камаях, Паставах, Мосары, Глыбокім і аграгарадке Удзел. У Мосары хлопцы здзейснілі Крыжовы шлях на гару, дзе ўзвышаецца самы вялікі крыж у Беларусі. Кульмінацыяй вакацыйных падарожжаў была пілігрымка ў Росіцу, дзе хлопцы разам з салезіянамі прынялі ўдзел у росіцкіх урачыстасцях, прысвечаных благаслаўлёным Антонію і Юрыю, марыянам-мучанікам.

Гэты летнік быў цікавы і багаты на падзеі. Удзельнікі на заканчэнне ProVocatio падзякавалі арганізатарам і выказалі надзею сустрэцца зноў у наступным годзе. А мы ўжо сёння запрашаем хлопцаў ва ўзросце 14+ на наступны летнік. Сачыце за інфармацыяй на партале sdb.by, альбо звяртайцеся асабіста да салезіянаў.

 

Фотагалерэя

Апошнія навіны

Думкі ксяндза Боско

Бог Айцец ведае, чаго мы патрабуем, ведае яшчэ да таго, як папросім Яго. Варта прасіць, каб атрымаць больш, і не абавязкова для сябе.

Св. Ян Боско