Панядзелак, 14 Май 2018 16:58

Дыяканскае пасвячэнне атрымаў салезіянін Артур Ляшнеўскі SDB

Аўтар

12 мая Артур Ляшнеўскі SDB разам з адзінаццаццю сабратамі салезіянамі з Польшчы і Украіны атрымаў дыяканскае пасвячэнне з рук дапаможнага біскупа Мінска-Магілёўскай дыяцэзіі Аляксандра Яшэўскага SDB. Абрад пасвячэння быў удзелены ў касцёле св. Станіслава Косткі ў Кракаве.

 

Дыяканскае пасвячэнне ўводзіць кандыдатаў у духоўны стан, таксама дазваляе справаваць некаторыя сакрамэнты, абвяшчаць Слова Божае і благаслаўляць верных. Літургія ў гэты дзень скіроўвае ўвагу верных на два важныя аспекты: быць сведкам і місіянерам святога Евангелля, а таксама на паслугу міласэрнасці, якую дыяканы павінны здзяйсняць ва ўлонні Касцёла.

Біскуп Аляксандр Яшэўскі SDB у сваёй гаміліі звярнуўся да кандыдатаў, гаворачы пра абавязкі новага духоўнага стану. Іерарх звярнуў увагу на пакорную службу бліжнім, а таксама на вялікі дар прапаведвання Хрыста, якое з моманту пасвячэння стане абавязкам дыякана. Асабліва біскуп Аляксандр падкрэсліў значнасць Божага крыжа ў жыцці духоўнай асобы. Вельмі моцным было апавяданне пра адну з беларускіх парафій, якая не мела святара падчас камуністычнай навалы. Вернікі, не маючы каму вызнаць свае грахі, паставілі ў канфесіянале фігуру укрыжаванага Езуса, і яму спавядаліся са сваіх штодзённых слабасцей. Гэты прыклад разам з іншымі сімваламі і павучаннямі, якія біскуп Аляксандр пакінуў кандыдатам, дапамог ім больш зразумець таямніцу дыяканскага паклікання і падрыхтаваць сваё сэрца да прыняцця гэтага асаблівага дару Езуса Хрыста.

На ўрачыстасці прысутнічалі шматлікія пілігрымы з Беларусі, якія прыбылі ў Кракаў, каб маліцца за дыякана Артура і падтрымаць яго сваёй прысутнасцю. Акрамя свецкіх гасцей з Беларусі, прысутнічалі на св. Імшы таксама некаторыя кансэкраваныя асобы. Кс. Віктар Гайдукевіч SDB, рэгіянальны настаяцель місіі св. Францішка Сальскага, на заканчэнне прамовіў да новапасвячаных дыяканаў ад імя ўсёй Салезіянскай сям’і ў Беларусі, ўпэўніваючы, што за іх моляцца і чакаюць на бацькаўшчыне.

Пасля ўрачыстай літургіі ў місійным парку пры салезіянскай семінарыі адбыўся пачастунак і святочная праграма. Акрамя гульняў, спеваў і танцаў, прысутных чакаў міні-канцэрт саксафаніста Антонія Грыневіча, які выканаў некалькі прыгожых твораў. Пасля праграмы беларускія госці мелі магчымасць наведаць гістарычныя і святыя месцы Кракава.

13 мая пілігрымка беларусаў вырушыла ў Кальварыю Забжыдоўскую, каб цэлебраваць разам Імшу падзякі. Кальварыя – гэты польскі марыйны санктуарый. Гэтае месца было выбрана невыпадкова. У 2016 годзе дыякан Артур атрымаў тут з рук Маці Божай цуд аздараўлення нагі, якая была ў вельмі цяжкім і небяспечным стане. Падчас Эўхарыстыі, якую узначаліў глыбокапаважаны біскуп Аляксандар Яшэўскі SDB, быў благаслаўлены залаты вотум – сімвал удзячнасці за атрыманы цуд. Вотум ў форме палаючага сэрца мае таксама гравіроўку з інтэнцыяй падзякі і год цуду. Пасля Імшы вотум быў перададзены манахам бернардынам, апекунам санктуарыя, якія размясцілі яго на дошцы падзякі каля цудатворнага абраза.

Удзячны Богу і Божай Маці Успамозе Хрысціянаў, дыякан Артур ад ўсяго сэрца дзякуе ўсім, хто за яго маліўся ў гэтыя дні, а асабліва тым, хто падтрымаў яго сваёй прысутнасцю. Ён просіць таксама, каб і далей вернікі працягвалі атуляць яго малітоўнай апекай на шляху падрыхтоўкі да святарскага пасвячэння, якое адбудзецца праз год.

Фотагалерэя

Апошнія навіны

Думкі ксяндза Боско

Памятайце, што ўшанаванне нядзельных свят прыносіць Божае благаслаўленне на ўсе справы тыдня

Св. Ян Боско