У 18.00 распачалася рэгістрацыя, усяго ў Салезіянскіх Днях Моладзі будзе ўдзельнічаць каля 80 маладых людзей ад 10 класа да 35 гадоў, з розных куткоў нашай краіны, як з салезіянскіх парафій, так і з іншых.

Пасля рэгістрацыі ўсіх удзельнікаў чакаў пасілак, а потым у араторыі адбылася праграма “Салезіянскі двор”. Моладзь была падзелена на чатыры каманды, ім за абмежаваны адрэзак часу неабходна было прыдумаць прадстаўленні і падзяліцца сваімі талентамі. Адна група танцавала, другая спявала, трэцяя малявала, а чацвёртая паказвала тэатральны нумар. Кожнае прадстаўленне было накіравана на тое, каб больш поўна раскрыць Дэвіз 2017 года.

Завяршаецца вечар пятніцы на Салезіянскіх Днях Моладзі супольнай адарацыяй Найсвяцейшага Сакрамэнту. Святы ян Боско кожны свой крок, кожны свой чын, кожную сваю задуму давяраў Езусу, у Ім ён чэрпаў свае сілы, і ў еднасці з Езусам была вялікая моц заснавальніка салезіянскага таварыства. Так імкнуцца рабіць і сучасныя салезіяне, і да гэтага заклікаюць і моладзь.

Пасля адарацыі ўсе накіраваліся па хатах мясцовых парафіян, дзе паслухалі традыцыйнае салезіянскае слоўка на добрую ноч.