Падчас святой Імшы перад усімі прысутнымі хлопцы склалі міністрантскія абяцанні і прынялі комжы, як сведчанне таго, што яны будуць старацца праз служэнне пры алтары і ў штодзённасці дасягнуць святасці. Гэта быў вельмі важны і доўгачаканы момант у іх жыцці. Каманда кандыдатаў у міністранты таксама павялічылася. Да кандыдатаў далучыліся Роберт Пятрэнка і Антон Нарковіч, якія самі праявілі жаданне стаць міністрантамі. Напрыканцы кс. Аляксандр Мятліцкі SDB падарыў новым міністрантам прыгожы вобраз св. Дамініка Савіо. Пробашч парафіі пажадаў маладым людзям, гледзячы на свайго святога апекуна, імкнуцца жыць так, як жыў ён. Пасля святой Імшы святкаванне працягнулася ў араторыіі за салодкім сталом.