Аўторак, 20 Красавік 2021 11:09

Традыцыйны Пасхальны фестываль прайшоў у Смаргоні

Аўтар Наталля Субко, ADMA

11 красавіка 2021 года ў свята Божай Міласэрнасці ў парафіі Св. Міхала Арханёла ў Смаргоні быў арганізаваны традыцыйны Пасхальны фестываль “Аллелюя”. Праграма прайшла у араторыі, які дзейнічае пры парафіі.

У канцэртнай праграме прынялі ўдзел два хоры, дзіцячы пад назвай “Вясёлыя ноткі” і дарослы, а таксама ўдзельнікі малодшай і старэйшай груп “Савіо-клуба”, выхаванкі Дзявочага клуба, моладзевая група араторыя, салезіяне супрацоўнікі,  жанчыны з Асацыяцыі Марыі Успамогі Хрысціянаў (ADMA), узорны танцавальны дзіцячы ансамбль “Мішутка”, танцавальны калектыў “Маладосць”, айцы салезіяне і сёстры салезіянкі. 

Удзельнікі фестывалю падрыхтавалі для парафіянаў і гасцей араторыя многа выдатных канцэртных нумароў розных жанраў. Святочныя спевы, хрысціянскія бансы, танцавальныя нумары, вершы, літаратурныя і тэатральныя замалёўкі – кожнае выступленне іскрылася радасцю і ўдзячнасцю Езусу Хрысту за Яго Перамогу.  

Напрыканцы фестывалю кс. Павел Шчарбіцкі SDB, дырэктар супольнасці салезіянаў у Смаргоні, павіншаваў усіх са святамі,  а таксама заклікаў дарослых і дзяцей захаваць Велікодную радасць і перадаць яе сваім блізкім і родным і кожны дзень пражываць з удзячнасцю Пану Богу.

Фотагалерэя

Апошнія навіны

Думкі ксяндза Боско

Будзь радасным, але няхай гэтая радасць будзе шчырая, якая зыходзіць з усведамлення, вольнага ад граху. Нашаю апораю з’яўляюцца радасць, малітва і святая Камунія

Св. Ян Боско