Свята распачалося святой Імшой, якую цэлебраваў дапаможны біскуп Мінска-Магілёўскай архідыяцэзіі Юрый Касабуцкі. Падчас казання іерарх звярнуў увагу прысутных на еднасць Салезіянскай сям’і, адзначаючы, што ўсе разам - святары, сёстры і салезіяне супрацоўнікі - выконваюць давераную ім міссію, як часткі аднаго цела. Таксама біскуп падзякаваў салезіянам за працу, якая праводзіцца з моладдзю і запрасіў маліцца аб новых пакліканнях да святарскага і манаскага жыцця.
Пасля святой Імшы гасцей і ўсіх прысутных чакаў працяг святкавання ў араторыі святога Дамініка Савіо. У салезіянскай радасці і з добрым настроем усе раптам апынуліся на небе, на сходзе салезіянскіх святых. Сам ксёндз Боско распавёў сваім сябрам, што ён бачыў падчас свайго падарожжа ў Бараўляны.
Моладзевы гурт “Крылы” парадаваў прысутных сваім спевам, маленькія дзеткі выканалі танец і песню, сцэнку падрыхтавалі салезіяне супрацоўнікі, была магчымасць паказаць і паглыбіць свае веды праз удзел у віктарыне пра жыццё святога Яна Боско, паглядзець фокусы. Таксама былі падведзены вынікі фотаконкурсу “Святасць магчыма і для цябе”.
Скончылася свята традыцыйным слоўкам на добрую ноч, якое прамовіў біскуп Юрый Касабуцкі.