У першы дзень удзельнікі змаглі добра правесці час праз гульні, смачную вячэру і канферэнцыю. Падчас канферэнцыі, якую праводзіла с. Юлія Клявец FMA, моладзь разважала аб сямі ключавых словах дакумента “Instrumentum Laboris”, які прызначаны для дапамогі біскупам на Сінодзе, прысвечаным моладзі. Разважалі над словамі “слуханне”, “суправаджэнне”, “зносіны”, “распазнанне”, “праблемы”, “пакліканне”, “святасць”. Таксама ў гэты дзень у моладзі была магчымасць памаліцца каля Найсвяцейшага Сакрамэнта.

У нядзелю ў удзельнікаў РДС была магчымасць падрыхтавацца да св. Імшы, разважаючы над Словам Божым пры дапамозе кс. Паўла Шчарбіцкага SDB. Таксама быў момант цішыні для асабістага разважання.
Кульмінацыяй рэкалекцый была св. Імша, якую цэлебраваў кс. Павел Шчарбіцкі SDB. У казанні кс. Павел адзначыў, што часам чалавек, прыходзячы на св. Імшу, выконвае пэўную “сістэму рухаў і слоў”, не ўсведамляючы, што падчас св. Імшы знаходзіцца каля самаго Езуса Хрыста. Святар заклікаў прысутных, каб усе моманты св. Імшы былі для верніка жывымі.

Пасля св. Імшы моладзь накіравалася ў араторый, каб падвесці вынікі і выказаць падзяку ўсім, хто дапамагаў падчас рэкалекцый.