Панядзелак, 15 Кастрычнік 2018 18:52

Ксёндз Казімір Шыдэлко SDB адзначыў 25 год святарскай паслугі на Усходзе

Аўтар

13 кастрычніка 25 год святарскай палугі на Усходзе адзначыў ксёндз Казімір Шыдэлко SDB, пробашч Бараўлянскай парафіі Марыі Успамогі Хрысціянаў.

Ксёндз Казімір нарадзіўся ў Польшчы ў вёсцы Нова Высь, прыняў Сакрамант Святарства ў 1986 годзе і ўжо праз некалькі год накіраваўся з місійнай дзейнасцю на Усход. За гэты час кс. Казімір паспеў папрацаваць у салезіянскіх дамах Адэсы і Масквы і ўжо доўгі час працуе ў Беларусі, з’яўляючыся пробашчам парафіі Марыі Успамогі Хрысціянаў у Бараўлянах.

На святочную святую Імшу прыбыло шмат шаноўных гасцей. Дапаможны біскуп Мінска-Магілёўскай Архідыяцэзіі Аляксандр Яшэўскі SDB. Ксёндз Дэкан Ян Крэміс, і, канешне, сабраты салезіяне на чале з рэгіянальным настаяцелем салезіянскага таварыства ў Беларусі ксяндзом Віктарам Гайдукевічам SDB.

З казаннем да прысутных звярнуўся біскуп Аляксандр. Спачатку ён распавёў прысутным гісторыю свайго асабістага знаёмства з ксяндзом Казімірам. Біскуп распавёў, што менавіта па яго ініцыятыве ў той час, калі ён з’яўляўся яшчэ дырэктарам салезіянскай супольнасці ў Мінску, ксёндз Казімір прыехаў працаваць у Беларусь.

Далей іерарх разважаў над вартасцю і вялікай адказнасцю святарскага жыцця. “Папа Францішак перасцерагае нас, духоўных асоб, тых, хто выбраў шлях паклікання, каб несці свету святасць, каб не стаць тымі, хто выконвае прафесію святара, кансэкраванай асобы, а быць тымі, хто спаўняе пакліканне,” – абгрунтаваў біскуп Аляксандр свае думкі выказваннямі Папы.

Таксама біскуп закрануў такі важны атрыбут святара як яго адзенне, а менавіта сутана. “У дзень атрымання сутаны ў вачах усіх семінарыстаў яна з’яўляецца прыгажэйшай за вясельную сукенку маладой, апрануўшы яе ўсе мы выглядаем шчаслівымі і гэта зразумела. Трэба заставацца ў сутане шчаслівым і тады, калі сутана пачне быць і тым, аб чым нагадвае яе чорны колер – пахавальным покрывам для гэтага свету.”

Пасля святой Імшы ўсе накіраваліся ў араторый, дзе адбыўся працяг святкавання. Парафіяне, дзеці і моладзь, розныя парафіяльныя рухі падрыхтавалі для свайго любімага пробашча прыгожую святочную праграму. Праз розныя нумары, вершы і спевы вернікі дапамаглі ўсім прысутным узгадаць асноўныя моманты працы ксяндза Казіміра на Усходзе. Святары салезіяне падарылі свайму сабрату дыплом ганаровага грамадзяніна Беларусі, падкрэсліваючы тым самым важнасць працы, якую ён ажыццяўляе ў нашай краіне.

Напрыканцы свята ксяндзу Казіміру было ўдзелена ўжо стаўшае для салезіянаў традыцыйным благаслаўленне ад усіх сабраных.

Фотагалерэя

Апошнія навіны

Думкі ксяндза Боско

Нагамі хадзіце па зямлі, а сэрцам жывіце ў небе

Св. Ян Боско