Звычайна ў Салезіянскай Кангрэгацыі больш інтэнсіўная падрыхтоўка да таго моманту, калі сабрат скажа сваё “так” Богу назаўсёды, пачынаецца за год да гэтай падзеі. Гэта як бы “вяртанне ў навіцыят”, але ўжо з пэўным жыццёвым вопытам. Салезіянін глядзіць на сваё жыццё ўжо з перспектывы прынамсі пяці гадоў жыцця ў Кангрэгацыі.

Падчас гэтага тыдня кс. Франко ді Натале SDB, кс. Луіжды Калапай SDB і кс. Паоло Фікера SDB дапамагалі маладым сабратам паразважаць над сваім жыццём, матывацыямі, паглыбіцца ў салезіянскую духоўнасць, вярнуцца да крыніцаў салезіянскай харызмы, яшчэ больш даведацца аб асобе ксяндза Боско. Шмат увагі адводзілася таксама на тое, каб маладыя сабраты дзяліліся паміж сабой асабістым вопытам салезіянскага жыцця. Гэты час быў цудоўнай магчымасцю, каб быць разам, маліцца разам, дзяліцца радасцямі і цяжкасцямі, даведацца пра асаблівасці перажывання салезіянскай харызмы ў іншых краінах і на іншых кантынэнтах.