Субота, 30 Чэрвень 2018 07:43

СМЕП-19, дзень чацвёрты: “Сустрэча, як спрыяльны час для рэалізацыі - пакліканне”

Аўтар

Чацвёрты дзень СМЕПа распачаўся сустрэчай з Панам, на якой маліліся разам з пілігрымамі з Маладзечна і Вілейкі. Пасля св. Імшы салезіянская пілігрымка працягнула свой шлях да Маці Божай Будслаўскай.

Праз некалькі кіламетраў шляху надышоў час для канферэнцыі, якую для пілігрымаў прамовіў дыякан Артур Ляшнеўскі SDB. Разважаючы пра пакліканне, дыякан звярнуў увагу на тое, што яно з'яўляецца вельмі індывідуальным для кожнага чалавека, няма двух аднолькавых гісторый паклікання. У сучасным свеце людзі перасталі шукаць пакліканне, жыццё кожнага добра распланавана і ў гэтых планах няма месца для Божага замыслу. Пакліканне павінна рэалізоўвацца ў штодзённасці. Гэта ахвяра свайго інтэлекту, здольнасцяў, сілаў на карысць іншага чалавека, таго, каго Бог паставіў на тваім жыццёвым шляху. Трэба прасіць Бога, каб наша сэрца расшыралася духоўна і білася ў рытме неба - з любоўю да кожнага чалавека.

Пасля канферэнцыі пілігрымы накіраваліся ў далейшы шлях - да вёскі Куранец, дзе быў абед і праца ў групах па матэрыялах канферэнцыі.
Падсілкаваўшыся і глыбей паразважаўшы над тэмай дня, пілігрымы зрабілі фінальны дзевяцікіламетровы рывок да вёскі Рэчкі. У Рэчках Божыя вандроўнікі мелі магчымасць памыцца ў лазнях мясцовых жыхароў. Чыстыя - і ад гэтага вельмі давольныя - СМЕПаўцы расклалі свае намёты і пачалі рыхтавацца да вясёлага евангелізацыйнага вечара, пад час якога працягвалі разважаць над тэмай дня.

Завяршэнне дня атрымалася вельмі кранальным - пілігрымы і мясцовыя жыхары, ўзяўшы свечкі і чытаючы ўрыўкі з Евангелля, прайшлі так званым Шляхам Святла да месца, дзе яшчэ год таму стаяла праваслаўная царква. У снежні царква згарэла, зараз на яе месцы будуецца новы храм. На месцы будовы пілігрымаў сустрэў мясцовы праваслаўны святар айцец Валянцін. Пілігрымы, мясцовыя жыхары і святар разам памаліліся аб хуткім будаўніцтве царквы.

Перад сном у пілігрымаў застаўся вольны час,які моладзь з вялікай ахвотай выкарыстала на спевы, танцы, гульні, сэлфі і размовы. Калі надышоў змрок, удзельнікі СМЕПа разышліся па сваіх намётах, каб адпачыць.

Фотагалерэя

Апошнія навіны

Думкі ксяндза Боско

Трэба каб былі укрыжаваныя разам з Езусам Хрыстом. Яго крыж з’яўляецца флагам і штандарам. Хто не хоча яго наследваць, не годзен быць яго вучнем

Св. Ян Боско