Чацвер, 28 Чэрвень 2018 04:45

СМЕП-19, дзень 2: “Сустрэча, якая падштурхоўвае ісці наперад -распазнаваць”

Аўтар

Другі дзень салезіянскай пілігрымкі распачаўся са святой Імшы. Казанне для пілігрымаў прамовіў дыякан Артур Ляшнеўскі.

Звяртаючыся да вернікаў, дыякан адзначыў, што кожны з прысутных з’яўляецца прарокам. Дыякан Артур падкрэсліў, што Бог паклікаў кожнага быць прарокам, што прарок павінен казаць праўду радыкальна, а не гаварыць тое, што хоча пачуць ад яго іншы чалавек. Праўда робіць прарока бачным, таму варта задумацца над тым, хто з нас з’яўляецца праўдзівым прарокам, а хто – фальшывым. Прарок не можа адначасова рабіць знак Крыжа, а потым рабіць зло, не можа вуснамі вымаўляць веру ў Бога і зласловіць. Калі рабіць нешта на два фронты, то немінуча прайграеш.

Напрыканцы Імшы прысутныя павіншавалі добра знаёмага ім пробашча войстамскай парафіі Уладзіслава Сурвіла, які некалькі год таму сам крочыў шляхамі СМЕПа і які адзначаў дзень сваіх імянін.
У гэты дзень СМЕП ішла з Войстама ў Нароч, разважаючы над тэмай “СУСТРЭЧА, якая падштурхоўвае ісці наперад - РАСПАЗНАВАЦЬ”. Канферэнцыю па дадзенай тэме для пілігрымаў прамовіў ксёндз Аляксандр Мятліцкі SDB, які адмыслова для гэтага з Мінска завітаў у СМЕП. Ксёндз Аляксандр разважаў у сваёй канферэнцыі над сцэнай з Евангелля, у якой Езус спаткаўся з самаранкай. Святар распавёў пра гісторыю адносінаў паміж юдэямі і самаранамі, а таксама пра гісторыю месца, дзе адбывалася сустрэча. Так сэнс евангельскай сцэны стаў больш зразумелы.

У канферэнцыі ксёндз Аляксандр казаў, што мы па прыкладу самаранцы павінны пасля сустрэчы з Езусам абудзіцца ад свайго старога жыцця. Мы павінны прагнуць той жывой вады, якую нам прапануе Бог, а не таго, што ў дадзены момант патрабуе нашае цела. Таксама ксёндз Аляксандр звярнуў увагу на тое, што мы павінны больш глыбока перажываць Эўхарыстыю, бо гэта нашая студня, месца, дзе мы сустракаемся з Хрыстом.
У Нарочы ўжо па добрай традыцыі адбыўся Хрост пілігрымаў, якія ўпершыню ідуць у СМЕП.
Вечарам жыхары Нарочы ўжо чакалі евангелізацыйны вечар, які кожны год для іх прэзентуюць пілігрымы.

Фотагалерэя

Апошнія навіны

Думкі ксяндза Боско

Памятайце, дзеці мае, што кожны хрысціянін абавязаны даваць прыклад бліжняму, ніводнае слова не выхоўвае так, як добры прыклад.

Св. Ян Боско