Серада, 27 Чэрвень 2018 09:33

СМЕП-19, дзень першы: “Сустрэча, якая не пакідае абыякавым - слухаць”

Аўтар

Вось і надышоў доўгачаканы кожным пілігрымам момант - са Смаргоні выйшла дзевятнаццатая Салезіянская Моладзевая Евангелізацыйная Пілігрымка. Па сведчанням шматлікіх маладых людзей, пілігрымка для іх - гэта адзін з самых важных, выдатных і плённых перыядаў на працягу года.

Сёлетні шлях пілігрымаў будзе суправаджацца дэвізам “Пане, дай мне гэтай вады!”. Разважаць над гэтай тэмай вернікам будуць дапамагаць штодзённыя канферэнцыі і праца ў невялікіх групах.

Распачалася салезіянская пілігрымка традыцыйна са святой Імшы, якую ўзначаліў рэгіянальны настаяцель салезіянскага таварыства ў Беларусі ксёндз Віктар Гайдукевіч SDB. Пад час казання ксёндз Віктар разважаў над дэвізам Салезіянскай сям'і на бягучы год, які супадае з дэвізам пілігрымкі. Рэгіянальны настаяцель звярнуў увагу на тое, што над дэвізам мы разважаем ужо цэлы год, глыбей раскрываючы яго ў такіх буйных якцыях, як Салезіянскія дні моладзі і СМЕП. Дэвіз заклікае даць маладому чалавеку тое, што ён сапраўды патрабуе, слухаць яго, суправаджаць. Але мы, прыналежныя да Салезіянскай сям’і, робім гэта не самі, фінальным і галоўным пунктам з'яўляецца сустрэча з Езусам Хрыстом.

Тэма першага дня ў рамках дэвіза пілігрымкі гучала так: “Сустрэча, якая не пакідае абыякавым - слухаць”. Раскрыць гэтую тэму ў канферэнцыі сёння дапамагалі салезіяне супрацоўнікі Эдуард і Вераніка Рогач, а таксама Алена Аўласевіч. Тры галоўныя аспекты ўмення слухаць, якія сённяшнія лектары адзначылі ,былі наступнымі: слухаць самога сябе, слухаць іншага чалавека і слухаць Бога.

Пасля канферэнцыіі адбылася праца ў невялікіх групах, якая дапамагла пілігрымам больш глыбока паразважаць над тэмай дня.

Вечарам СМЕПаўцы прыйшлі ў веску Войстам, дзе пасля вячэры адбыўся традыцыйны вясёлы вечар, які завяршыўся слоўкам на добрую ноч.
Стомленыя, але задаволеныя пілігрымы разышліся на начлег у мясцовую школу і намёты, каб набрацца сіл на чарговы дзень шляху да Маці Божай Будслаўскай!

Фотагалерэя

Апошнія навіны

Думкі ксяндза Боско

Да хваробаў душы трэба адносіцца так жа сур’ёзна, як да хваробаў цела.

Св. Ян Боско